Que hai detrás dun Berberecho de Noia? Para descubrilo hai que ir ata a súa orixe, camiñar polos bancos marisqueiros e aprender a mirar a ría cos ollos de quen leva toda a vida traballando nela. O Roteiro das Mareas é unha proposta de turismo mariñeiro que ofrece precisamente iso: achegarnos ao marisqueo desde dentro e descubrir todo o coñecemento, o traballo e o respecto polo medio que hai detrás dun dos produtos máis emblemáticos de Galicia.
Impulsado por mariscadoras e mariscadores de Noia e Outes, a proposta permite descubrir unha das actividades máis representativas da ría directamente da man de quen mellor a coñece: os seus profesionais.
O marisqueo, contado polas súas protagonistas
Que hai detrás dunha xornada de marisqueo? Como se traballa nos bancos? Que especies se extraen? Roteiro das Mareas nace precisamente para achegar esta realidade a visitantes e veciñanza.
Durante as visitas guiadas, os mariscadores e mariscadoras da Confraría de Noia levan aos participantes ata os bancos marisqueiros para explicarlles como é o seu traballo e como transcorre o día a día na ría.
Unha experiencia que permite ir máis alá da paisaxe e coñecer o marisqueo desde dentro, achegándose ás persoas, aos espazos e aos procesos que fan posible esta actividade.
Un oficio estreitamente ligado á ría de Noia
O marisqueo forma parte da historia e da identidade da ría de Noia. A actividade nos bancos marisqueiros está regulada e só pode ser realizada por profesionais autorizados, en zonas determinadas e seguindo un modelo de extracción artesanal e sostible.
Roteiro das Mareas permite facer visible todo ese coñecemento que existe detrás do oficio e entender un traballo directamente condicionado polos ciclos naturais da ría e pola xestión dos seus recursos.
No caso do Berberecho de Noia, por exemplo, a trazabilidade permite seguir cada lote desde o banco marisqueiro ata o consumidor final e acreditar a súa procedencia.
Unha actividade con gran importancia social e económica
O marisqueo é tamén unha actividade da que dependen numerosas familias da comarca. Entre 1.400 e 1.600 familias viven directamente do marisqueo do berberecho e máis de 1.500 profesionais traballan neste ecosistema.
Roteiro das Mareas permite poñer rostro a esa dimensión humana: os visitantes poden coñecer ás mariscadoras e mariscadores, falar con eles e descubrir as súas experiencias de primeira man.
Ademais, o proxecto nace como unha vía para diversificar a actividade das mariscadoras a pé e abrir novas fontes de ingresos para o colectivo. Para preparar esta nova vertente, as agrupacións participaron nun curso de turismo mariñeiro e deseñaron diferentes experiencias para achegar o seu traballo á cidadanía.
Da ría á lonxa: coñecer o percorrido do produto
Outra das experiencias de Roteiro das Mareas é a visita á lonxa, que permite descubrir que ocorre co produto unha vez rematada a xornada de extracción.
Durante a visita pódese coñecer o funcionamento das máquinas de clasificación, achegarse ao proceso de depuración e entender os pasos polos que pasa o marisco antes da súa comercialización. A proposta contempla tamén a posibilidade de adquirir produto.
No caso do Berberecho de Noia, o produto pasa polas lonxas oficiais de Testal e O Freixo, onde se subasta, clasifica e calibra.
O marisqueo tamén entra nas escolas
A vertente divulgativa de Roteiro das Mareas chega tamén aos colexios a través de charlas nas escolas.
O obxectivo é que os máis novos coñezan o traballo das mariscadoras e mariscadores, descubran a riqueza do mar que teñen ao seu redor e comprendan a importancia de coidalo.
Deste xeito, o proxecto achega ás novas xeracións un oficio que forma parte da historia, da cultura e da vida de moitas familias da contorna, promovendo o coñecemento e o respecto polo medio mariño.
Como participar no Roteiro das Mareas
As persoas interesadas en coñecer as próximas actividades ou solicitar información sobre as experiencias de Roteiro das Mareas poden contactar directamente coa iniciativa:
Teléfono: 635 456 314
Correo electrónico: roteirodasmareas@gmail.com
Localización: Porto de Testal, Noia (A Coruña)
